IQBOLIMIZ BITILGAN KITOB

Muvaffaqiyat pog‘onalarini zabt etishda keng tafakkur va dunyoqarash barobarida huquqiy bilimlar beqiyos ahamiyatga ega. Shuning uchun ham kelajagimiz egalari ongiga bolalik chog‘laridanoq Konstitutsiyamiz mazmun-mohiyatini singdirish, ularning huquqiy bilim va madaniyatini yanada oshirishga yuksak e’tibor qaratilmoqda.
Shu maqsadda har yili an’anaviy tarzda o‘tkazib kelinayotgan “Konstitutsiya – baxtimiz poydevori” respublika ko‘rik-tanlovining viloyat bosqichi bo‘lib o‘tdi. Unda tuman-shahar bosqichlarida faol ishtirok etib, g‘oliblikni qo‘lga kiritgan 48 nafar o‘g‘il-qiz belgilangan shartlar asosida bahs olib bordilar. Insho, bayon, rasm chizish kabi shartlarni qamragan tanlov davomida ishtirokchilar huquqiy bilimlarni qanchalik puxta o‘zlash­tirayotganliklarini namoyish etdilar. Bellashuv yakuniga ko‘ra, bayon yo‘nalishi bo‘yicha Kosonsoy tumanidagi 33-umumta’lim mak­tabining 7-sinf o‘quvchisi Madina Munavvarxonova g‘oliblikni qo‘lga kiritgan bo‘lsa, insho yo‘nalishida Yangiqo‘rg‘on tumanidagi 10-umumta’lim maktabining 10-sinf o‘quvchisi Sarvinoz Isakjanova 1-o‘ringa loyiq topildi. Norin tumanidagi 44-umumta’lim maktabining 9-sinf o‘quvchisi Jamshid Po‘latov esa, rasm yo‘nalishida raqiblarini ortda qoldirdi. Barcha g‘olib o‘quvchilar tanlovning mamlakat bosqichida viloyatimiz sharafini himoya qiladilar.

Shohista ERMATOVA,
VXTBda ona tili va adabiyoti fani uslubchisi